سياسة الخصوصية

آخر تحديث: ٢٢ أكتوبر ٢٠٢٦

كأس الجلسة لعبة أسئلة جماعية على الموقع www.jalsacup.com وتطبيق الآيفون. نحفظ أقل قدر من البيانات تحتاجه اللعبة عشان تشتغل، وما نبيعها لأحد.

باختصار: ما نطلب إيميلك ولا جوالك ولا اسمك الحقيقي، وما فيه إعلانات ولا أدوات تتبع. الحساب اسم مستخدم وكلمة سر، والباقي إحصائيات لعبك.

من نحن

كأس الجلسة مشروع يديره مطوّر فردي في المملكة العربية السعودية، وهو المسؤول عن بياناتك. للتواصل في أي شي يخص الخصوصية استخدم صفحة الدعم.

البيانات اللي نحفظها

• حسابك: اسم المستخدم، وكلمة السر محفوظة بتشفير ما يرجع (ما نقدر نقرأها حتى إحنا)، وتاريخ إنشاء الحساب.
• رصيدك: عدد الألعاب الباقية، وبطاقات تبديل الفئة، والمكافآت، وموعد آخر «لعبة اليوم» المجانية.
• الأسئلة اللي شفتها: عشان ما يتكرر عليك نفس السؤال.
• سجل ألعابك: أسماء الفرق اللي تكتبونها، والفئات، والنتيجة، ووقت اللعبة، عشان تظهر في صفحة «ألعابي». نحتفظ بآخر ١٠٠ لعبة.
• اللي ترسله لنا: البلاغات عن الأسئلة، واقتراحات الفئات والميزات، ورسائل نموذج التواصل، مع اسم حسابك إذا كنت مسجل دخول. ولو كتبت وسيلة للرد في نموذج التواصل، نستخدمها للرد عليك بس.
• معلومات تقنية عن سرعة التحميل: نوع الجهاز والمتصفح، ونوع الاتصال، وكم أخذ كل جزء من الصفحة عشان يتحمل. نستخدمها عشان نسرّع اللعبة، ونحتفظ بآخر ١٠٠ تقرير بس.
• عنوان IP بشكل مؤقت: لمنع تخمين كلمات السر والرسائل المزعجة. ينحذف خلال ساعة. ومزوّد الاستضافة يسجّل الطلبات في سجلاته لفترة قصيرة، مثل أي موقع.
• مود المقدم والاختيار السري: حالة اللعبة (اللوحة والسؤال المفتوح وجوابه والنتيجة) تنحفظ برمز عشوائي في الباركود، وتنحذف تلقائياً بعد ١٢ ساعة.

اللي ما نسويه

• ما نطلب إيميل ولا رقم جوال ولا اسم حقيقي ولا موقعك.
• ما فيه إعلانات، ولا أدوات تحليل أو تتبع من شركات ثانية.
• ما نبيع بياناتك ولا نشاركها للتسويق.
• ما نوصل للكاميرا ولا المايك ولا الصور ولا جهات الاتصال.

اللي ينحفظ على جهازك

• كوكي الجلسة: يخليك مسجل دخول ٣٠ يوم. ينحذف لما تسجل خروج.
• التخزين المحلي في المتصفح: اللعبة اللي شغالة عشان تكملها، وبطولة الكأس، وكروت اللعبة السريعة، وإعداد الصوت. هذي تبقى على جهازك وما توصلنا.

الشركات اللي تساعدنا نشغّل اللعبة

• Vercel: استضافة الموقع والخادم.
• Upstash: قاعدة البيانات اللي فيها الحسابات والرصيد.
• ويكيميديا كومنز: بعض صور الأسئلة والفئات تتحمل من خوادمهم مباشرة.
• Apple Music: مقاطع الأغاني معاينات رسمية تتحمل من خوادم أبل.

خوادم هذي الشركات ممكن تكون خارج المملكة. ولما تتحمل صورة أو مقطع من ويكيميديا أو أبل، يوصلهم عنوان IP ونوع متصفحك مثل أي موقع، حسب سياسات الخصوصية حقتهم.

المدفوعات

إذا اشتريت ألعاب من داخل تطبيق الآيفون، يتم الدفع عن طريق أبل، وما يوصلنا رقم بطاقتك ولا بياناتك البنكية. ونفس الشي لو اشتريت من الموقع: الدفع يمر على بوابة دفع مرخصة، ويوصلنا بس إن العملية تمت وكم لعبة نضيف لحسابك.

كم نحتفظ بالبيانات

نحتفظ ببيانات حسابك لين تطلب حذفه. والبيانات المؤقتة اللي فوق تنحذف تلقائياً في وقتها. ولما ينحذف الحساب، ينحذف معه رصيده وسجل ألعابه والأسئلة اللي شافها. أما البلاغات والاقتراحات اللي أرسلتها، فممكن تبقى بدون ربطها بحسابك.

حقوقك

حسب نظام حماية البيانات الشخصية في المملكة، لك تطلب:

• نسخة من بياناتك.
• تصحيحها.
• حذف حسابك وكل بياناته.

اطلب أي شي منها من صفحة الدعم، واختر الموضوع «حذف الحساب» أو «الخصوصية»، واكتب اسم حسابك. ننفذ الطلب خلال ٣٠ يوم، وغالباً أسرع بكثير.

الأطفال

اللعبة للعايلة والربع، والحساب يسويه ويديره شخص بالغ، والصغار يلعبون معه على نفس الجهاز. ما نجمع بيانات من الأطفال بشكل مقصود. وإذا تعتقد إن طفل سوّى حساب بنفسه، تواصل معنا ونحذفه.

التعديلات

إذا غيرنا هذي السياسة، نحدّث التاريخ اللي فوق. وإذا كان التغيير كبير، نبلّغكم داخل اللعبة.