سياسة الخصوصية

آخر تحديث: ٨ نوفمبر ٢٠٢٦

كأس الجلسة لعبة أسئلة جماعية على الموقع www.jalsacup.com وتطبيق الآيفون. نحفظ أقل قدر من البيانات تحتاجه اللعبة عشان تشتغل، وما نبيعها لأحد.

باختصار: ما نطلب جوالك ولا اسمك الحقيقي، والموقع ما فيه إعلانات ولا أدوات تتبع. تطبيق الآيفون فيه إعلانات تختار تشوفها مقابل فيش، ويسألك إذا تسمح بالتتبّع. الحساب اسم تختاره، تدخل فيه بحساب Apple أو Google أو بكلمة سر. إذا دخلت بـ Apple أو Google نحفظ الإيميل اللي يعطينا إياه، عشان نتواصل معك بخصوص حسابك بس، والباقي إحصائيات لعبك.

من نحن

كأس الجلسة مشروع يديره مطوّر فردي في المملكة العربية السعودية، وهو المسؤول عن بياناتك. للتواصل في أي شي يخص الخصوصية استخدم صفحة الدعم.

البيانات اللي نحفظها

حسابك: الاسم اللي يطلع في اللعبة، وتاريخ إنشاء الحساب. وإذا دخلت باسم مستخدم وكلمة سر، فكلمة السر محفوظة بتشفير ما يرجع (ما نقدر نقرأها حتى إحنا).
إذا دخلت بحساب Apple أو Google: نحفظ رقم تعريف ثابت يعطينا إياه Apple أو Google عشان نعرف إنه أنت لما ترجع، والإيميل اللي يعطينا إياه (مع Apple تقدر تختار «إخفاء بريدي» ويوصلنا عنوان بديل من Apple). نستخدم الإيميل للتواصل معك بخصوص حسابك ومشترياتك بس، وما نرسل عليه تسويق، ويشوفه مدير اللعبة بس. ما ناخذ صورتك ولا جهات اتصالك. ومع Apple نحفظ كمان رمز يخلينا نلغي ربط حسابك عندهم لما تحذف حسابك.
رصيدك: رصيد الأفياش وحركاته (كم زاد أو نقص ومتى وليش)، والاشتراك إذا اشتركت، والمكافآت، وموعد آخر «لعبة اليوم» المجانية.
الأسئلة اللي شفتها: عشان ما يتكرر عليك نفس السؤال.
سجل ألعابك: أسماء الفرق اللي تكتبونها، والفئات، والنتيجة، ووقت اللعبة، عشان تظهر في صفحة «ألعابي». نحتفظ بآخر ١٠٠ لعبة، وبأرقام أسئلة كل لعبة ٦٠ يوم عشان تكمّلها من جهاز ثاني. واللعبة اللي ما خلصت تنحفظ كاملة (اللوحة والأسئلة اللي طلعت والنتيجة) عشان تكمّلها من أي جهاز، وتنحذف أول ما تخلص (نحتفظ بآخر ٨ ألعاب ما خلصت).
كود الدعوة: لكل حساب كود دعوة. لما يستخدمه صديق، نسجّل اسم حسابه في حسابك واسم حسابك في حسابه عشان نعطيكم هدية الدعوة.
اللي ترسله لنا: البلاغات عن الأسئلة، واقتراحات الفئات والميزات، ورأيك في مود «ثلاث جولات» (عجبك أو لا)، ورسائل نموذج التواصل، مع اسم حسابك إذا كنت مسجل دخول. ولو كتبت وسيلة للرد في نموذج التواصل، نستخدمها للرد عليك بس.
معلومات تقنية عن سرعة التحميل: نوع الجهاز والمتصفح، ونوع الاتصال، وكم أخذ كل جزء من الصفحة عشان يتحمل. نستخدمها عشان نسرّع اللعبة، ونحتفظ بآخر ١٠٠ تقرير بس.
أمان الحسابات: نحتفظ بآخر ٢٠٠ طلب رفضه الخادم (اسم الحساب، والصفحة، ونوع الرفض، بدون محتوى الطلب)، وممكن تبقى لفترة قصيرة بعد حذف الحساب. وإذا دخل حساب ببرنامج آلي نوقفه ونحفظ معه اسم البرنامج لين نراجعه.
عنوان IP بشكل مؤقت: لمنع تخمين كلمات السر والرسائل المزعجة. ينحذف خلال ساعة. ومزوّد الاستضافة يسجّل الطلبات في سجلاته لفترة قصيرة، مثل أي موقع.
مود المقدم والاختيار السري: حالة اللعبة (اللوحة والسؤال المفتوح وجوابه والنتيجة) تنحفظ برمز عشوائي في الباركود، وتنحذف تلقائياً بعد ١٢ ساعة.

اللي ما نسويه

ما نطلب رقم جوال ولا اسم حقيقي ولا موقعك، والإيميل ما ناخذه إلا من Apple أو Google وقت الدخول.
الموقع ما فيه إعلانات، ولا أدوات تحليل أو تتبع من شركات ثانية. الإعلانات بس في تطبيق الآيفون، ولما تختار أنت تشوف إعلان مقابل فيش (تحت).
ما نبيع بياناتك ولا نشاركها للتسويق.
ما نوصل للكاميرا ولا المايك ولا الصور ولا جهات الاتصال.

اللي ينحفظ على جهازك

ألعاب بدون نت (تطبيق الآيفون، للمشتركين): نسخة من ملفات اللعبة و١٠ ألعاب بأسئلتها واسم حسابك، وترتفع نتائجها لما يرجع النت. تنحذف لما ينتهي اشتراكك وأنت متصل.
كوكي الجلسة: يخليك مسجل دخول ٣٠ يوم. ينحذف لما تسجل خروج.
التخزين المحلي في المتصفح: اللعبة اللي شغالة عشان تكملها، وبطولة الكأس، وكروت اللعبة السريعة، وإعداد الصوت. هذي تبقى على جهازك وما توصلنا.

الشركات اللي تساعدنا نشغّل اللعبة

Vercel: استضافة الموقع والخادم.
Upstash: قاعدة البيانات اللي فيها الحسابات والرصيد.
Cloudflare: لما تلعبون بجوالات الفرق أو مود المقدم، الجوالات وشاشة اللعبة تتصل بغرفة عندهم توصّل حركات اللعبة لحظتها. الغرفة ما تحفظ شي.
Apple وGoogle: إذا اخترت تدخل بحسابك عندهم، يتم التحقق من هويتك عندهم، ويوصلنا منهم رقم التعريف بس.
ويكيميديا كومنز: بعض صور الأسئلة والفئات تتحمل من خوادمهم مباشرة.
Apple Music: مقاطع الأغاني معاينات رسمية تتحمل من خوادم أبل.
Google AdMob (تطبيق الآيفون بس): لما تضغط «شوفوا إعلان»، الإعلان يجي من Google AdMob. Google تجمع معلومات عن الجهاز (مثل نوعه ونظامه، ومعرّف الجهاز للإعلانات إذا سمحت فيه، وموقع تقريبي من عنوان IP) عشان تعرض الإعلان وتقيسه، حسب سياسة خصوصية Google. لما تفتح التطبيق، يسألك الآيفون إذا تسمح بالتتبّع. إذا سمحت، تقدر Google تستخدم معرّف الجهاز عشان تخصّص لك الإعلانات حسب نشاطك في تطبيقات ومواقع ثانية. وإذا رفضت، الإعلانات تشتغل عادي بدون هالمعرّف. وتقدر تغيّر اختيارك في أي وقت من إعدادات الآيفون (الخصوصية والأمان ثم التتبّع). ونرسل لـ Google اسم حسابك في اللعبة ورمز عشوائي بس، عشان نتأكد إنك كمّلت الإعلان ونضيف الفيش.

خوادم هذي الشركات ممكن تكون خارج المملكة. ولما تتحمل صورة أو مقطع من ويكيميديا أو أبل، يوصلهم عنوان IP ونوع متصفحك مثل أي موقع، حسب سياسات الخصوصية حقتهم.

المدفوعات

باقات الأفياش تنشرى حالياً من داخل تطبيق الآيفون، والدفع يتم عن طريق أبل. ما يوصلنا رقم بطاقتك ولا بياناتك البنكية: يوصلنا من أبل إثبات موقّع فيه رقم العملية والباقة وسعرها، ونحفظه مع اسم حسابك عشان نضيف الأفياش مرة وحدة بس، ونعرف لو استرجعت المبلغ. ولما يصير الشراء من الموقع، بيمر على بوابة دفع مرخصة بنفس الطريقة.

كم نحتفظ بالبيانات

نحتفظ ببيانات حسابك لين تطلب حذفه. والبيانات المؤقتة اللي فوق تنحذف تلقائياً في وقتها. ولما ينحذف الحساب، ينحذف معه رصيده وسجل ألعابه والأسئلة اللي شافها. أما البلاغات والاقتراحات اللي أرسلتها، فممكن تبقى بدون ربطها بحسابك. ونحتفظ برقم التعريف اللي يعطينا إياه Apple أو Google لحاله (بدون اسم ولا إيميل ولا أي بيانات ثانية) عشان إذا سويت حساب جديد ما تتكرر هدية الترحيب.

حقوقك

حسب نظام حماية البيانات الشخصية في المملكة، لك تطلب:

نسخة من بياناتك.
تصحيحها.
حذف حسابك وكل بياناته.

حذف الحساب: تقدر تحذفه بنفسك في أي وقت: في التطبيق من «المزيد» ← «حذف الحساب»، وفي الموقع من صفحة «ألعابي». ينحذف فوراً مع كل بياناته، وإذا كنت داخل بحساب Apple نلغي ربطه عندهم.

وباقي الطلبات (أو الحذف إذا ما تقدر تدخل) من صفحة الدعم: اختر الموضوع «الخصوصية» أو «حذف الحساب»، واكتب اسم حسابك. ننفذ الطلب خلال ٣٠ يوم، وغالباً أسرع بكثير.

الأطفال

اللعبة للعايلة والأخويا، والحساب يسويه ويديره شخص بالغ، والصغار يلعبون معه على نفس الجهاز. ما نجمع بيانات من الأطفال بشكل مقصود. وإذا تعتقد إن طفل سوّى حساب بنفسه، تواصل معنا ونحذفه.

التعديلات

إذا غيرنا هذي السياسة، نحدّث التاريخ اللي فوق. وإذا كان التغيير كبير، نبلّغكم داخل اللعبة.